Amanda Guðrún Bjarnadóttir íþróttamaður ársins hjá UMSE og Dalvíkurbyggð

18. janúar 2019

Amanda Guðrún Bjarnadóttir golfari og Haugnesingur var í gær, fimmtudaginn 17. janúar, kjörin íþróttamaður ársins 2018 hjá Dalvíkurbyggð en áður hafði hún einnig verið kjörin íþróttamaður ársins hjá UMSE. Amanda er fædd árið 2000 og var því aðeins 18 ára á síðasta ári en hún keppir fyrir Golfklúbbinn Hamar Dalvík.

Amanda Guðrún hefur staðið sig gríðarlega vel en í umsögn um hana á heimasíðu UMSE segir:

Amanda Guðrún hefur á síðustu árum verið fremst í sínum aldursflokki á Íslandsbankamótaröðinni og alltaf bætt sig á milli ára. Í ár dreifði hún álaginu betur í samráði við þjálfara sinn með því að leggja áherslu á stærstu mót hvorrar mótaraðar, Íslandsbanka og Eimskips, en fórnaði þess í stað möguleikanum á að verja stigameistaratitil sinn á Íslandsbankamótaröðinni.  Hún mætir mjög vel á æfingar og leggur sig ávallt 100% fram við þau verkefni sem fyrir hana eru lögð á æfingum og í keppni. Hún aðstoðar við þjálfun yngri kynslóðarinnar á sumrin, gerir það vel og er þeim mjög góð fyrirmynd. Amanda stefnir enn lengra í íþrótt sinni og leggur hart að sér við æfingar til að svo megi verða.

Árangur erlendis:

• Lék með U18 landsliði Íslands á Evrópumóti stúlknalandsliða U18 í Kungsbacka í Svíþjóð.
• European Spring Junior, Murcia Spáni. 9 sæti í flokki stúlkna 17 – 18 ára.
• Finnish Amateur Championship, Helsinki Finnlandi. 18. sæti í kvennaflokki.

Árangur á Íslandi:

• Íslandsmeistari í höggleik í flokki stúlkna 17 – 18 ára.
• Íslandsmeistari í holukeppni í flokki stúlkna 17 – 18 ára. (eini kylfingurinn sem hampaði báðum titlunum í ár)
• 12. sæti á Íslandsmóti fullorðinna í höggleik.
• Hársbreidd frá 8 manna úrslitum á Íslandsmóti fullorðinna í holukeppni. Var jöfn að stigum en með færri unnar holur.
• Besti árangur á Eimskipsmótaröðinni, mótaröð þeirra bestu, var 4. sæti.
• Stigameistari á Norðurlandsmótaröðinni í flokki stúlkna 18-21 árs.

Amanda er í 14. sæti á stigalista Eimskipsmótaraðarinnar en hún lék aðeins á 4 mótum af 6. Einnig var hún valin í kvennalandsliðshópinn fyrir 2019.

Við óskum Amöndu til hamingju með glæsilegan árangur!